Detansyon Ak ICE

Kòman m ka jwenn manman oubyen papa m oubyen yon lòt manm nan fanmi m si yo nan yon sant detansyon imigrasyon ki jere pa ICE ?

Si w konn non, dat nesans ak peyi nasyonalite li, ou gen dwa chèche sit kote yo ye a nan Zouti lokalizasyon detansyon ICE la ISIT.

Si w konnen Nimewo A yo a, ou ka chèche yo avèk nimewo sa a epi ak peyi nesans yo a tou.

Si paran w nan yon detansyon imigrasyon, non ak nimewo telefòn sant detansyon an pral afiche. Aprè sa a, ou ka rele sant detansyon an pou mande lè vizit yo ak règleman yo, oubyen verifye si enfòmasyon sa yo disponib anliy. Li enpòtan pou w sonje ke si w pa gen dokiman, ou ta dwe pale ak avoka imigrasyon w anvan w vizite yon sant detansyon.

Si paran w an detansyon, ou gen yon dosye byennèt timoun ki aktif, epi w vle mete ICE okouran afenke paran w ka prezan pou pwosè byennèt timoun nan, ou ka mande avoka byennèt timoun pa w oswa avoka imigrasyon w, oubyen w ka voye yon imèl bay ICE ou menm. Adrès imèl la se : Parental.Interests@ice.dhs.gov

Ki dwa mwen genyen si ICE vin lakay mwen?

Si ICE vin lakay ou, ou gen dwa debaz sa yo:

SCRAPPY TIP: Kòman ou ka wè diferans ant yon pèkizisyon ki siyen pa yon jij ak youn ki siyen pa ICE : Chache siyati jij la sou li. Si yon jij PA T siyen l, ou PA oblije louvri pòt la.

• Ou ka mande ICE pou glise pèkizisyon an anba pòt la oubyen afiche l nan fènèt la pou w ka li l.
• Si yo fòse pòt la ouvè, di « Mwen pa bay konsantman mwen » (« I do not consent » ann anglè) men pa lite avèk yo
• Ou gen dwa pou w gade silans ou. Di sa a awotvwa « Mwen ap egzèse dwa mwen pou m rete an silans » (« I am exercising my right to remain silent » ann anglè). Si w two pè pou w di yon bagay, ou ka bay yo yon kat Konnen Dwa w (Know Your Rights) ou ka enprime gratis nan lyen sa a.
• Ou gen dwa pale ak yon avoka si ICE arete w oubyen mennen w nan yon sant detansyon.
• Ou gen dwa pou w pale ak yon avoka anvan ou siyen nenpòt dokiman.
• Mande pou wè yon pyès idantite
• Fè foto oswa pran videyo si w ka fè sa a an sekirite.
• Pa montre fo dokiman ni bay manti.

Ki dwa mwen genyen si ICE vin nan lekòl mwen an?

Si ICE vin nan lekòl ou, ou gen dwa debaz sa yo:

• Mande ofisye a si w gen dwa ale. Si yo di w non, pa eseye kouri/sove ni kite lekòl la.
• Ou gen dwa pou w rete an silans. Ou pa oblije reponn okenn kesyon konsènan estati imigrasyon w ni kikote w tou fèt, ni okenn lòt kesyon.
• Ou pa oblije montre pyès idantite w ni okenn lòt dokiman.
• Pa montre fo dokiman ni bay manti.
• Di ofisye a ou chwaz rete an silans epi ou vle pale ak yon avoka.
• Ou gen dwa refize konsantman pou yon fouy, men yo gen dwa pase men yo sou kò pou wè si w pòte zam.
• Ou gen dwa refize siyen tout dokiman jiskaske w gen chans pou w pale ak yon avoka.

Ki dwa m genyen si ICE vin nan travay mwen?

Si ICE vin nan travay ou, ou gen dwa debaz sa yo:

• ICE gen dwa antre nan espas nan yon antrepriz ki ouvè bay gran piblik la, tankou yon resepsyon oubyen yon sal datant. Nan ka kontrè, yo dwe gen yon pèkizisyon valab ki siyen pa yon jij oswa yon konsantman. Menm si yon antrepriz bay konsantman pou ICE antre nan espas yo, sa a pa bay ICE otorite pou arete, kesyone oswa mennen yon moun nan yon sit detansyon.
• Si w ka kite espas la an sekirite, se pi bon pou w fè sa a. Si yo di w kanpe, se pou w kanpe. Pa panike ni tou pa kouri sove.
• Ou gen dwa pou w gade silans ou. Di sa a awotvwa: « Mwen ap egzèse dwa mwen pou m rete an silans » (« I am exercising my right to remain silent » ann anglè). Si w two pè pou w di yon bagay, ou ka bay yo yon kat Konnen Dwa w (Know Your Rights) ou ka enprime gratis nan lyen sa a.
• Ou pa oblije reponn ak okenn kesyon konsènan estati imigrasyon w. 
• Si yo mande w deplaes nan yon sit byen detèminen poutèt estati imigrasyon w, ou gen dwa refize fè sa a.
• Pa montre fo dokiman ni bay manti.
• Ou gen dwa pou w pale ak yon avoka anvan w siyen nenpòt dokiman.  Di sa a awòtvwa : « Mwen ap mande pale ak yon avoka anvan mwen siyen nenpòt bagay » (« I am requesting to speak with an attorney before I sign anything » ann anglè).

PA EGZANP: Si ICE di « ale sou bò gòch si w se yon sitwayen epi sou bò dwat si w se yon imigran ». Ou PA oblije fè sa a. PA kache ni eseye kouri sove. Ou gen dwa chwazi rete kote w ye a, ale nan milye sal la, elatriye men ou pa oblije deplase nan yon lòt espas ki gen dwa endike estati imigrasyon w.