Tribinal Imigrasyon

Kisa tribinal imigrasyon ye?

Non tribinal sa a se Biwo Egzekitif pou Evalyasyon Imigrasyon (EOIR), epi se yon ajans ki anba titèl Depatman Lajistis. Sistèm tribinal sa a se yon lòt tribinal / sistèm parapò ak tribinal ki resevwa pwosè byennèt pitit ou.

Tribinal imigrasyon, oubyen EOIR, se yon tribinal apa ak sa ki tande pwosè byennèt pitit ou a.  Li konn rele pwosedi ranvwa tou.  Si ou menm oswa paran w yo te resevwa yon Avi pou Parèt, Fòmilè I-862, oubyen yon « fich chaj » lè w te rive Ozetazini, ou gen dwa oblije asiste yon pwosedi ranvwa nan avni an, menm si ou pa gen youn kounyeya. Si w te gen yon pwosè nan tribinal imigrasyon epi w pa t parèt nan dat pwosè a, ou gen dwa gen yon òdònans depòtasyon. Li enpòtan pou w pale ak yon avoka imigrasyon osito li posib pou w.

Objektif pwosedi ranvwa yo nan tribinal imigrasyon se pou deside si yo pral ba w pwoteksyon kont depòtasyon, ki konn rele sekou imigrasyon, oubyen si w oblije kite peyi Etazini. Ou gen dwa pou w konteste pifò desizyon ki pran nan tribinal imigrasyon bay Komite Kontestasyon Imigrasyon an ki vle di ou ka mande pou yo revize l ankò si w pa dakò ak desizyon yo te pran. Kontestasyon sa yo dwe fèt rapid, kidonk li enpòtan pou w jwenn yon avoka ki pou ede w osito li posib.

Sonje byen, ou pa gen yon dwa otomatik pou w resevwa yon avoka gratis nan tribinal imigrasyon an, men gen resous ki la pou ede w jwenn yon avoka pou reprezante w gratis.

Kiyès ki travay nan tribinal imigrasyon an?

Jij imigrasyon (IJ): se moun sa a ki pral tande tout enfòmasyon yo epi pran yon desizyon final pou pwosè w.

Repondan: tribinal la oswa jij la gen dwa rele w konsa, paske jij la ap deside si ou gen dwa rete oswa si w dwe kite peyi Etazini an.

Konsèy pou Repondan an: sa a se avoka imigrasyon w. Se moun sa a ki reprezante w nan tribinal.

Depatman Sekirite Domestik (Department of Homeland Security, DHS): pafwa yo konn rele l « konsèy leta a » oswa « avoka ICE la », se moun sa a ki sèvi kòm avoka pou leta a ki pral mande jij la pou depòte w epi y ap prezante rezon ki jistifye poukisa yo panse yo dwe depòte w.

Ki dwa mwen genyen nan tribinal imigrasyon ?

Pi bon fason pou pwoteje dwa w yo nan tribinal imigrasyon an se pou w jwenn yon avoka imigrasyon ki ka esplike w ki opsyon w genyen pou pèmèt ou rete Ozetazini epi asire ke w jwenn yon pwosè ekitib devan jij la.

An jeneral, ou gen dwa sa yo: 
Dwa pou w jwenn yon avoka pou reprezante w, san leta a pa oblije peye anyen (kidonk, leta a p ap peye pou yon avoka imigrasyon)

Dwa pou w egzamine prèv leta prezante yo, founi pwòp prèv pa w yo, epi kont-egzaminen (oswa kesyone) temwen leta a mennen

Dwa pou w jwenn yon dosye konplè de tout temwayaj ak prèv ki fè pati pwosè a

Dwa pou gen yon entèprèt nan lang ou prefere a si w pa pale anglè pou ede w konprann epi patisipe, oswa fè pati, pwosè w la.

Kòman m pral konnen lè m gen yon randevou ak tribinal imigrasyon an ?

Tribinal imigrasyon an pral mete w okouran de pwosè imigrasyon w yo pa lapòs.  Ou dwe asire ke w mete adrès ou a ajou avèk tribinal imigrasyon an, pou w ka konnen kilè w gen yon pwosè. Dat pwosè yo nan tribinal imigrasyon konn chanje souvan.  Yo gen dwa avanse oswa repòte pou anpil diferan rezon.

Kòman m ka konnen si m gen yon pwosè ki fikse nan tribinal imigrasyon an?

Enfòmasyon sou Pwosè nan Tribinal Imigrasyon :

ISIT ou pral jwenn lyen pou w verifye dat ak sit pwosè a la anliy nan anglè oswa an panyòl.

Oubyen w ka rele liy dirèk EOIR la : 800-898-7180 oubyen tribinal imigrasyon kote pwosè w la loje.

Ki diferan tip pwosè ki egziste nan tribinal imigrasyon an?

Pwosè Kalandriye Prensipal pwosè sa yo fèt pou pwograme pwosè fiti yo kote dosye a pral diskite ansanm ak prèv epi ak temwen. Tribinal la pral òganize Pwosè Kalandriye Prensipal pou plizyè moun alafwa nan yon seyans maten oswa apremidi, kidonk ou gen dwa wè anpil moun nan tribinal la. Pwosè sa yo ouvè pou tout moun ki vle asiste. Ou menm oswa avoka w la gen dwa mande jij la anvan oswa pandan pwosè a pou fèmen l pou rezon konfidansyalite, tankou pou pwoteje w. Pwosè ki enplike timoun ta dwe fèmen pou gran piblik la.

Pwosè Kalandriye Endividyèl pwosè sa yo se kote yo pral diskite sou prèv yo epi avoka w la pral goumen pou pèmèt ou rete Ozetazini epi avoka leta a gen dwa bay agiman poukisa ou ta dwe rantre nan peyi dorijin ou. Menm si pwosè imigrasyon yo ouvè bay gran piblik la, souvan konn gen yon sèl pwosè endividyèl alafwa, kidonk p ap gen otan moun nan tribinal la parapò ak Pwosè Kalandriye Prensipal yo.

Lis Verifikasyon Imigrasyon

• Verifye dat ak lè pwosè w: Ou gen obligasyon pou w prezan nan pwosè tribinal ou menm si w gen lekòl, sòf si jij la ba w pèmisyon pou w pa asiste oubyen si l aksepte voye l nan yon lòt dat. Ou ta dwe asiste pwosè imigrasyon w menm si w pòko jwenn yon avoka imigrasyon. Pandan pwosè a, ou ka mande jij la pou l ba w plis tan pou pèmèt ou jwenn yon avoka.

• Adrès tribinal imigrasyon: Verifye sou sit wèb EOIR a pou asire w gen bon adrès tribinal imigrasyon an. Pafwa, tribinal yo konn chanje adrès, epi adrès ki endike sou avi pwosè w oswa adrès ou twouve sou Google gen dwa pa korèk.

• Kikote pou w pakin epi kòman pou w rive: Gen kèk tribinal imigrasyon ki sitye nan santrevil epi pa gen anpil kote pou w pakin machin ou. Pafwa tou, yo konn pataje yon sèl batiman ak lòt ajans federal yo, ki vle di sa a ka pran anpil tan pou pase nan sekirite a. Asire w ke w rive omwen dezèdtan anvan lè pwosè a pou si ta gen yon anpèchman.

• Si w pral mennen yon lòt moun pou sipòte w: Sonje byen ke tribinal imigrasyon an ouvè bay gran piblik la. Ou gen dwa mennen nenpòt moun ou ble, ansanm ak avoka w tou.

• Mache ak pyès idantite w ak fich chaj tribinal la si posib (Avi pou Parèt, I-862): Si w pa gen yon paspò oswa yon pèmi kondwi, mache ak nenpòt dokiman ki gen yon foto sou li, tankou pyès idantite lekòl ou, yon dokiman liberasyon ORR oswa nenpòt dokiman responsab dosye w ka ba w ki gen yon foto sou li.

• Prepare tèt ou :
  • Pou mande pou kominike nan lang ou prefere a epi ensiste pou yo ba w yon entèprèt nan lang ou konnen pi byen an.
  • Pou w deklare non w ak dat nesans ou ak adrès kote w ap viv kounyeya.
  • Pou w mande tribinal la plis tan pou jwenn yon avoka oubyen pou w di tribinal la kiyès avoka w la ye si w gen youn.
• Si w pa santi w alèz pou w reponn yon kesyon paske gen lòt moun nan tribinal la, ou ka mande jij la pou eskize lòt moun yo pou rezon konfidansyalite.

• Asire w mache ak ajanda w pou w ka di jij la si w ap disponib nan yon lòt dat.